حكاية الكرسي
حكاية الكرسي
فكرت قبل كده في حكاية صناعة الكرسي ؟
خلينا نعرّف الكرسي الاول ؛
يعتبر الكرسي قطعة اثاث مرتفعة مدعمة بأرجل و عادة استعماله بيكون لشخص واحد بس .
طيب خلينا نفكر ان مش سبب اختراع الكرسي هو ان الناس محتاجة تقعد ؛ لان اكيد الناس كانت بتقعد على حاجات مختلفة ، جزع شجرة / حجر / او مثلا حمار !
طيب امال امتى اخترعوا الكرسي ؟ 🤔
ممكن نقول انه من زمان – زماااان اوي
لقوا تمثال في بحر ايجه تابع لحضارة قديمة اسمها سيكلادس
لقينا تمثال قاعد على كرسي (٢١٠٠-٢٨٠٠ ق م) ايوه كرسي عادي بظهر و اربع رجلين
و طبعا تاني كرسي معانا و اشهر كرسي التحفة الفنية من الحضارة المصرية القديمة (٢٦٠٠ ق م) كرسي الملكة حتب حري الاولى من الاسرة الرابعة
معنى كده ان المصريين كانوا بيقعدوا على كراسي من ٢٦٠٠ سنة قبل الميلاد 😃
لا للاسف القعدة على الكرسي كانت متعلقة بوضعك الاجتماعي ، يعني لو وضعك الاجتماعي متدني هتشارك الناس في كراسي رديئة او هتقعدوا كلكم على الارض 😕
لكن لو الطبقة الارستقراطية هتقعد على كرسي بظهر و مسند ذراع و مزخرف كمان ، يا بختك 😉
تعالو نشوف الاغريق كانوا بيقعدوا ازاي
في القرن الخامس قبل الميلاد اخترع الاغريق نوع جديد من الكراسي اسمه (klismos)
ظهره فيه انحناء و رجليه كمان ، و انتشر الكرسي ده جدا حتى في رسومات و منحوتات الالهة الاغريقية
اما عند الرومان بقى كان الكرسي بتاعهم من غير ظهر او مساند للذراعين ، لكن كان رمز للقوة السياسية و العسكرية و كان اسمه (curule)
كان تقريبا على شكل x و على الرغم انه كان يعتبر قطعة اثاث فاخرة الا انهم كانوا متعمدين يخلوه مش مريح للقعدة لفترات طويلة ! عشان يفكروا الساسة انهم وضعهم مؤقت على الكرسي و تدمير طموحاتهم المستقبلية 😊
في العصور الوسطى كان القعاد على الكرسي بنفس فكرة المصريين القدماء ، مش اي حد يقدر يقعد على كرسي جميل ؛ فكان الناس العاديين بيقعدوا على اي حاجة تشبه الكرسي ؛ او مقاعد طويلة تشبه الدكة او المصطبة ( قعدة جماعية ) او على الارض ، و الكراسي للطبقة الارستقراطية
بس هو فعلا كل الناس بتحب تقعد على الكرسي ؟ 🤔
الحقيقة لا ؛ فيه شعوب بتفضل الارض او قعدة القرفصاء يعني بيقعدوا على الهوا 😅
زي روسيا و شعوب جنوب شرق اسيا و افريقيا و الهند و امريكا اللاتينية !
بيعرفوا يريحوا جسمهم بالقرفصاء ، تقريبا بتوزيع وزن الجسم على نفسه ، و ممكن يشتغلوا و ياكلوا و يستريحوا في الوضع ده 🤯
بس مع انتشار الكراسي رجعت الام الظهر ، لان عادة الكراسي ناشفة و جسم الانسان طري 🥟
عرفنا وضع جسم الانسان و هو قاعد و علاقته بالكرسي لاول مرة في القرن ال ١٨ ، من طبيب فرنسي اسمه ( نيكولا اندري ….) كان رائد في مجال جراحة العظام ، قال اننا محتاجين الجلسة تكون مسطحة اكتر مش مقعرة فحط دعامة تسند الجلسة
لغاية ما جه جراح عظام الماني اسمه ( فرانز ستافيل) حس ان الكرسي معمول عشان نشوف كويس و احنا قاعدين مش عشان نريح ظهرنا ! طيب هنرتاح امتى 🥺
عشان الفكرة دي اقترح مسند ظهر منخفض يدعم بس اسفل الظهر ؛ وقال انك و انت قاعد المفروض تعمل ضهرك حرف (ss)
و سماه كرسي المدرسة ، اكيد عرفتوه 😭
في القرن ال ١٩ بقى التعليم النظامي الزامي و كان الاطفال لازم يفضلوا وقت طويل في الفصل قاعدين على الكراسي ؛ فضلوا يخترعوا كراسي غريبة و عجيبة لدرجة ان فيه منها له قيود للجبهة و مساند للوجه و احزمة امان !!
سنة ١٩١٣ جه عالم تشريح سويسري اسمع (هانز شترازر) صمم كرسي مسند الظهر مايل شوية من فوق و المقعد مايل شوية كمان عشان يدعم اسفل الفخدين ، و فعلا بعد ٣٥ سنة اكدت الباحثة السويسرية برضو (بنجت اكيربلوم ) بعد ما صورت العضلات و ميكانيكا الجسم في الجلوس بالاشعة ؛ و صممت كتير من الكراسي فيه ميل من اعلى مسند الظهر و في القاعدة
لكن في العصر الحديث … هناك ملك واحد للكراسي بلا مناااازع ؛ الكراسي اللي كلنا شفناها و قعدنا عليها
الكرررررسي الملك (The Monobloc)
يعني الكتلة الواحدة … الخفيفة الوزن ،القابلة للتخزين ، المصنوعة من مادة ( البولي بروبيلين)
الكرررررسي البلاستيك
الاكثر انتشارا في العالم ؛ اتصمم سنة ١٩٤٦ من المصمم الكندي (DC Simpson) اسمه حتى سهل 😍
لكن بدا انتاج انواع و كميات من الكرسي البلاستيك في السبعينيات ، و من ساعتها فضل ينتشر و يتكاثر حول العالم 🗺
و الجميل انه بيدوم و يستمر و في متناول الجميع لانه تصنيعه بيتكلف حوالي ٣ دولار 😉
كرسي هنا يا بني للبشمهندس
مش ده مش البلاستيك ؛ هات كرسي مصنع الكراسي 😂
